النص الكامل لآخر مكالمة بيني وبين صديقي باراك أوباما

النص الكامل لمحادثتي الهاتفية مع الرئيس أوباما مساء 15 صباح 16 مايو

صباح الخير يابشر
طبعا إنتوا متعرفوش علاقتي با أبو حسين
طبعا في ناس هتقول لي مين هو ده ، أبو حسين صديقي من زمان باراك حسين أوباما .عرفتوا

لقيته بسم الله الرحمن الرحيم ، أول ماسمع صوتي كان هينط ويطلع من التليفون ، وحالته تصعب عالكافر..

آل إيه بيقول لي حرام عليكم ، …
إيه اللي بتعملوه فينا ، إيه ده ، أنا ومجلس الأمن القومي في حالة انعقاد دائم بسبب مصر والمصريين ..
حرام .. والله حرام مش عارفين نشوف شغلنا …

قلت له إهدا يابوحسين مش معقول كده ، ياراجل ماتصدقش انك لسة صغير ، يابوحسين مش ليك النرفزة ، العالم كله عايزك عالأقل لغاية الانتخابات بتاعتكم

وبعدين بلاش تنكبنا فيك ، مش كفاية ساركوزي اللي روح بدري بدري ، وجابلنا أولاند لسة مش عارفين هيعمل فينا ايه.. قول لي بس مين مزعلك وأنا أروقهولك.

قال لي مدير المخابرات جاي لي من كام يوم مقدم استقالته ..
طبعا قفلت الباب ووطيت على رجله أبوسها في إيه يابا في ايه ياعم ، الراجل قعد يهرتل ويقول لي إيجبشن إيجبشن ، نو واي يامعلم نو واي ..
تصدق قال لي يامعلم ، قلت له أحب على رجلك إهدا وفهمني ، ولمون على مية ، لقيته بيقولي..
عصير قصب

تخيل ياصاوي .. عصير قصب ، د أنا بقالي كام سنة أعرفك ، ماعمرك قلت لي إنكم بتشربوا عصير قصب
قلت له: منين؟ ، قال لي: من عند الواد مسعد اللي قبل النفق ، قلت له انهو نفق ، قال لي: ياجدع النفق اللي على آخر الشارع ، قلت له : هنا في واشنطن
قال لي : آه تخيل ياصاوي عندنا واحد بيعمل قصب

أنا قلت له : استنى يابوحسين قال لك ياجدع
قال هي: دي اللي وقفتك ، باقول لك عصير قصب في واشنطن ، تقول لي جدع
قلت له : أصلا عصير قصب في واشنطن عادي جدا
أصلا لو مقلتليش كنت أنا قلت لك هات له عصير قصب ..
المهم يابوحسين هو زعلان ليه.
قال لي وحياة أبوك الغالي بلغ المصريين أبوس أيديكم ياشيخ قول لهم يبعدوا عن فيس بوك وتويتر..
طبعا أنا كنت باكلمه وأنا بعمل ريتويت ، رفعت إيدي
وقلت له نععععم .. قال لي : ايوه هو برضه بقى بيقولها
قلت له: سيبك منه يابوحسين وقول لي عايز المصريين يسيبوا فيس بوك وتويتر ..
دا انت بتهرج ، دانت ناوي الثورة تبقى عندك بكرة الصبح
قال لي : ثورة ثورة مافيش مشكلة ، بس اللي بيحصل يفوق طاقة الاحتمال البشري والتكنولوجي..
بالمناسبة انت مش ملاحظ انخفاض معدلات البطالة عندنا
قلت له: معلش يابوحسين أنا مش متابع عندكم ، بس عندنا واكلة هوااا ، بس ليه؟
قال لي : ياسيدي ، القوة العاملة أغلبها شغال بيحلل أنتوا بتقولوا إيه
قلت له : بتحللوا..!! ده عادي ..ما إحنا عارفين إن كل الكلام واصل عندكم
بس أنا عارف إن بيل جيتس مش مقصر هو والشباب شغالين الله ينور

قال : انت مش عارف مهو من غلبه سابها لفرماوي ، مصري عارفه ؟
قلت له : آه ده مصري بس أنا كنت فاكر إنه عشان عبقري
قال لي : ما أنا كنت فاكر كده ، بس بيل قال لي: لأ أنا جبت واحد مصري يفهم الإيجبتولوجي عشان يفهم البرامج بتهنج ليه والأجهزة بتتحرق ليه ، دا الأجهزة بقت بتعمل أصوات غريبة ، عارف زي مايكون واحد زوره واجعه وبيغرغر ، لا لا زي مايكون بالع كلب ومخنوق بيه
طبعا أنا فهمت ، قلت له خلاص فهمت الله يقرفك ، هي مش كده خالص
قال لي:الغريب إن الصوت ده بقى منتشر هنا بين موظفي البيت الأبيض ، كل ما واحد يتجنن من حاجة يروح عامل كده
قلت : ماشي ماشي قول لي بقى في إيه ..
قال لي: أيوه إبقى بعدين إشرح لي إيه حكاية “ماشي” دي أحسن بقت كارثة هي كمان
المهم ياباشا .. عايزك تسأل لي المصريين .. هم عايزين ايه بالضبط..
بس وحياة الغالي ياشيخ ماعاد حد يكتب حاجة ، بس لمدة ساعتين نغير البرنترات .. دي بقت بتسبلنا الدين
أنا عايز افهم ، الواد من دول يقول لك مطبق من أول امبارح
عارف عشان بس نفهم مطبق دي قعدنا قد ايه ، بلاش أقولك
بس العيال هنا بقوا بيعملوا الصوت ده على طول
لما سألناهم لقينا إنهم بيعملوه عشان يدوا لنفسهم حافز آل ايه عشان مايناموش
إنت بقى ياصاوي قل لي ، من خبرتك ، الناس عايزة ايه
قلت له: إشمعنى

طبعا عمل نفس الصوت
وقال: هاتدخلي قافية؟!

قلت له : حدد يابوحسين ..
أنهي ناس ؟

قال لي: هو أنا بقيت عارفلكم ، دا أنتوا عالم تجن الجن ياراجل .

طبعا مش هقعد انبهكم كل شوية للمصطلحات اللي أبوحسين بقى بيقولها ، والله الراجل ده كان فلة.

ماعلينا.
قلت له: طب كده انت هتوديني في داهية، لو حكيتلك هادخل في قصة تخابر ، وأنت عارف قضائناالشامخ معندوش ياما أرحميني

قال لي : لا لا ماتخافش ، ساعتها هنقدم مستندات إنك أصلاً ضللتنا..
أصلاً أنا بأسألك ، وأنا عارف إنك مش هتحل حاجة..
المهم خليني بس افهم مين المرشح اللي دخل في النص ، اسمه مش عارف إيه عيسى ..
ده جاي مع مين
ولا تبع ايه ..

قلت له: معرفوش
قال لي: مهي دي المشكلة كل ما نسأل حد.. يقول لك مين ده؟!

مش مشكلة ، قول لي الأول الناس عايزة المشير ولا مابتحبهوش ولا إيه حكايته
قلت له : الله يزحولك يابوحسين ده موضوع تبدأ بيه
يابا شوف لي حد على قدي صحفي – حزبي – حقوقي حاجة كده يعني ، وزير ماشي ،عضو مجلس شعب آه .
لكن المشير مرة واحدة
قال لي: ماانتوا تجننوا
ناس تشتم فيه ، وهم هم يطلعوا يقولوا الجيش خط أحمر..
كأنهم اخترعوا المية السخنة ، ماهو في الدنيا كلها كده ، وعشان كده مستغرب ..

قلت له: ياعم أنا ماليش دعوة
أنا بالعافية طلعت من قضية تهرب ، يعني لا أعرفه ولا شفته
أرحمني بقى بدل ماقفل السكة في وشك الساعة دي
قال: ماشي ياصاوي هي وصلت تقفل السكة في وشي ، ماشي يابا
طيب قول لي في واحد اسمه وائل عباس

أنا بقى اللي عملت له الصوت اللي أنتوا عارفينه
وقلت له: ايوه
قلت لي: المشير ماله

قال لي: بقول لك وائل عباس
قلت له: انت مابتفهمش ، ده لا أقدر لا أنا ولا انت ولا عشرة زي بلدك يقف قدامه
قال لي: لا لا ..
والله عايز أعرف هو زعلان من مين ، وراضي عن مين
شيوعي ولا بيحب السادات ولا زعلان من نوارة ، قلت له الله يحرقك انت ناوي تشردني .. طبعا ..

هو قاعد يقرأ الأسامي من ورق وكل شوية كأن حد بينقله ، طبعا فهمت انه بتاع المخابرات

قلت له: يابوحسين قول لابن الكلب ده يهبط ، ويجيب لي حد على قدي

قال لي: لأ .. بس طب قول لي هي نوارة “دي” شيعية بصحيح !!

طبعا رحت قافل السكة في وشه ..
قعد يتصل وينطلي من رقم لرقم وأنا مبردش
راح ابن اللذين مخلي السفيرة تتصل من رقم مصري
قالت لي : إيه يا مستر صاوي ، مستر بريزدنت أول مرة يتصل على رقمي بيقولك مبتردش عليه ليه
قلت لها: ما أنا عارف بيرن لي ويقفل عشان اتصل بيه ، وأنا رصيدي خلص ، قلت لما أشحن وأكلمه ..
مارضيتش أشرده قدام الموظفة بتاعته
قالت لي : مش مشكلة هو عالخط وهحولهولك
لقيته بيقول لي: يامريض نفسيا ، تقفل السكة في وشي
قلت له: أديك قلتها ، حل عني بقى أنا أصلا متخلف أكلم واحد زيك خصوصا في اللي انت فيه
قال لي : بلاش دول ، في واحد قال عليه بلال فضل من كام يوم
قلت : بس كملت
قلت له يعني انت عارف بلال يعني
قال لي : آه مش ده بتاع الباشا تلميذ- ده نرجع له بعدين
بس اللي قال عليه اسمه إيه وهو قاعد بيخبط ويرزع عالورق اللي قدامه
وبعدين قال لي : آه عبحليم قنديل
قلت له : ماشي ماله
قال لي : مين ده
بلال بيقول كان بيقابله في أمن الدولة لما كان بيسلم التقارير
قلت له: يعني بلال كان بيسلم تقارير ؟
قال لي مش مشكلتنادلوقتي بلال
وبعدين مش هو اللي قال يبقى آه
قلت له : حلاوتك يابوحسين أنتوا بتحللوا كده – هو قال يبقى آه
طيب تأخذها نصيحة من صديق
قال لي : قول
قلت له : إنت بقى أحسن حاجة تعملها حفاظا على تناسل الشعب الأمريكي تعمل شت داون لأم السيرفرات كلها
وتدي العيال دي اجازة مدفوعة سبعتاشر سنة
لأن لو معملتش كده يبقى العيال دي هتقاضي الحكومة الأمريكية ليوم الدين وهتضطروا تستلفوا من طوب الأرض عشان تدفعوا تعويضات
ويمكن تطلبوا مننانبعث لكم قضاه ومحامين
وندخل بقى في منظمات حقوقية مصرية بتشتغل في أمريكا
وعبمعز بتاع أمريكا يهربهم ، ودستورية ونقض وتقسيم ومش هتخلصوا

لقيت واحد طالع لي في التليفون ، بيقولي : انت قلت له ايه
قلت له: إنت مين
قال لي: أنا بتاع المخابرات بروح أهلك
قلت له : فين أبوحسين
قال : مين؟؟
قلت له : آه مستر بريزيدنت ، حاكم أبوحسين دي بيني وبينه بس
قال لي : ده رمى لي السماعة وقام يجري رايح ناحية الحمام وفومتد في السكة وبهدل المكتب
قلت له: طب ياراجل شوفه وطمنني عليه
قال لي : مش شغلك ، الطاقم الطبي تدخل وهم عارفين شغلهم
قال : قول لي
قلت له لاااا ياحبيبي آخر الربع جني هنا
قال لي : هو أنا راكب ترام
قلت له إنت كمان عرفت الترام ، ماهو ده اللي أنتوا فالحين فيه ، وبعدين ياجاهل اسمه ترماي
إسمع ياسمك ايه لما يفوق ريسك خليه يكلمني
مش ناقصة تلبسني تهم عالصبح ، تخابر وعمالة ، وأنتوا ساعتها تنفضوا إيدكم ، وازحول أنا والعيال
قال باي ذا واي ايه بقى ازحول دي
أصل مكتوبة كتير ، والرجالة عاملين عليها دوائر حمرة
قلت له: حمره
إمشي يالا …وقفلت السكه
آه والنعمة قفلت السكة
ده اللي حصل وقفلت تليفوني

نشفتوا دمي ، ونشفتوا دمهم
طبعا أنا متوقع في أي لحظة تيجي السفيرة ولا يمكن أبوحسين نفسه ييجي البيت
قولوا لي أعمل ايه أنا مش فاهم حاجة خالص

#حملة_مراجيح_مولد_النبي‬‏ الرئاسية #مصر #أبوحسين_أوباما

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s