كلام يخض المرحلة …..

بما إننا قربنا نكمل نص سنة مع السيد الرئيس الأستاذ الدكتور محمد محمد مرسي عيسى العياط حفظه الله فنحن مضطرون أن نكمل معه مدته الرئاسية ، في صحبة صديقه وصبيه الدكتور هشام قنديل ” المخضوض دائما” وبالتالي فإني أرى إن إحنا نقسم الشعب ست انصاص عشان ربنا يكرمنا ونعدي الأيام اللي جاية على خير
وتقسم الأنصاص كما يلي
نص يسيب البلد عشان يخف الحمل ويساعد النص اللي برة إنه يصرف على النص اللي
جوة
ونص يشوف مين اللي يحكمنا الست سنين اللي جاية
ونص ياخد باله من الحدود الآمنه
ونص يزرع
ونص يقلع
ونص يغرق الأرض
ونص يحرق العرض
ونص يجيب حق الشهدا
ونص ياكل حق الشهدا
ونص يدور على حسن البرنس يشيل إيده من عالفيسبوك
ونص يعمل لعصام العريان على تويتر بلوك
ونص يتفرج عالتلفزيون
ونص يشتم اللي بيطلع في التلفزيون
ونص يشتم أم صاحبه
ونص يلعن سلسفين تلاتين اللي جابوا أبو صاحبه
ونص يحوش بين البت وامها
ونص يفرق بين الست وحماتها
ونص يشيل الأخ من فوق أخوه
ونص يشوفلنا الزند قاعد لغاية إمتى
ونص يشوفلنا النايم العام خالع إمتى
ونص ياكل حق أخوه
ونص يبص للقمه في إيد جاره
ونص ينهب اليتيم
ونص ينصب عالنص اللي نهب اليتيم
ونص ياخد باله من المزلقانات
ونص يحارب الفساد
ونص يلم من الزراعة الآفات
ونص يعمر الصحرا
ونص يحارب السحره
ونص يبور الوادي
ونص يسرق الكهربا
ونص يعمل حملات إزالة
ونص يلم الزبالة
ونص يسلك صرف الغسالة
ونص يصحي العيال تروح المدرسة
ونص يعمل السندوتشات
ونص يقف على عربية الفول
ونص يضرب عن العمل
ونص يقطع السكة الحديد
ونص يقطع الصحراوي
ونص يقف بيفط عالزراعي
ونص يحرق قش الرز
ونص يقعد عالفيسبوك
ونص يسوق التكتك
ونص يعلق بنات
ونص يتحرش بالستات
ونص يولع في الزبالة
ونص يدور في الصناديق
ونص يدور الزبالة
ونص يعمل موقعة الصناديق
ونص يحط الدستور
ونص يعترض على صبحي صالح
ونص يشتم في الغرياني
ونص ينتخب البابا
ونص ينتخب الكتاتني
ونص يولع في نفسه
ونص يطفي الحريقة
ونص ياكل في نفسه
ونص يعمل جمعيات
ونص يقبضها الأول
ونص يطلع في صفحة الوفيات
ونص يتفرج عالماتشات
ونص يقول ده مابيفهمش
ونص يقول ده رغاي
ونص يقول ده ضلالي
ونص يشحت
ونص يسرق السياح
ونص ينسى اللي فات
ونص يقرا اللي جاي
ونص يقول ده حمار
ونص يشتم ” الأخيار” الأبرار
ونص يدافع عن الأشرار
ونص يفبرك أخبار
ونص يولع النار
ونص يتبل اللحمة
ونص يحلب الفرخة
ونص يسرق الفرحة
ونص يبلع العلقم
ونص يتف في الشارع
ونص يضرب لخمة
ونص يغرق في شبر مية
ونص يعمل أحزاب
ونص يعمل إئتلاف بين الأحزاب
ونص يعمل تحالفات
ونص يؤسس قنوات
ونص يستضيف نص
ونص فاهم يغني على نص جاهل
ونص يحكم
ونص يأمر
ونص يخطط
ونص ماينفذش
ونص مايروحش الشغل
ونص يحتفل بالمولد
ونص يسرق في نفس المولد
ونص ياكل بالوظة
ونص ياكل محمر ومشمر
ونص ياكل هوا
ونص يدور عالدوا
ونص يغش
ونص يعس
ونص يفتش
ونص يهدف
ونص يفنش
ونص يرصص
ونص يلف
ونص يشم
ونص يأذن
ونص يرنم
ونص يصلي
ونص يدعي
ونص يولع
ونص يودع
ونص يلمع
ونص يقمع
ونص ياخد باله
ونص في حاله
ونص ولا على باله
ونص شاري دماغه
ونص ولا هو عارف حاجة
ونص بيجري
ونص بيمشي
ونص بيخترع
ونص مش مصدق
ونص مبهور
ونص منهور
ونص موتور
ونص حمَار
ونص عتال
ونص تباع
ونص ونص ونص
شفتوا بلد كلها نصاص في نصاص ، مافيش حد واقف مع حد ، كله واقف قصاد النص التاني ، حتى لما يتجوز يقولك نصه الحلو !!! ، ولما يشبهوا بعض يقول لك فولة واتقسمت نصين
أيها الرئيس الأستاذ الدكتور محمد محمد مرسي عيسى العياط أنت تحكم بلداً كلها نصاص ، لا هتعرف تلم نص على نص ، ولا تفرز نص عن نص ، ياعم انت كان مالك ومال الهم ده ، بجد انت مصدق انك رئيس مصر .. رئيس على مين .. على شعب فيه زويل ولا صباحي ولا البرادعي ولا حمزاوي ولا أبو حامد ولا أبو الغار ولا الشاطر ولا السيد البدوي ولا أبو الفتوح ولا نوارة ولا وائل ولا يسري فوده ولا الإبراشي ولا أم أيمن ولا مين ولا مين … مين من دول يمثل أقرب صورة للشعب اللي بتحكمه ..
ماشي .. آخرك هتعمل ايه
تعين رئيس وزرا لا من تمه ولا من كمه ، على رأي الشوام ، مخضوض على طول ، روح روح تعالى تعالى

إيه الجنان اللي إحنا فيه ده
لا مية ماشية
ولا كهربا جاية
ولاعيال بتتعلم
ولا أب محترم
ولا كبير له قيمة
ولا جار له كرامة
ولا رغيف نضيف
ولا رصيف سليم
ولا حد فاهم
ولا حد عايز يعترف إنه مش فاهم

أنا مش فاهم إنت ناوي على إيه
جاي تحرر فلسطين
ولا جاي تصلح مصر
ولا عايز تبقى أردوغان
ولا عايز تفضل في التجمع
ولا تحارب الفساد
ولا ترجع حق الشهدا
ولا تشغل العاطلين
ولا تصلح علاقتك مع أفريقيا
ولا تصدر الثورة
ولا إيه … فهمني

فين النهضة .. في ولا مافيش

طيب والدستور
أسمع كلام صبحي صالح أقول خلصت
أقرا الدستور ، لو عقد بيع زريبة بيبقى مكتوب أحسن من كده
بس اللي مش فاهمه ، اللي معترض عالدستور ،معترض على إيه ، أنت فهمت منه حاجة
أنا شخصيا بقى لي باشتغل مع العقود عقدين من الزمان مافهمتش .. المية بني آدم اللي كتبوا الدستور شاربين ايه أصلا

فين يافقهاءنا الدستور اللي هيتكتب في تلات اشهر ، فين المية وخمسين مشروع دستور اللي جاهزين بس عايزين تنقيح
فين

فين ايه … أنا باقول ايه؟؟
هي الناس عارفة هي فين أصلا؟

والله زهقت ، وخايف
زهقت من المشاوير الفاضية
زهقت من الجري في الشوارع
زهقت من مقابلات الشغل
زهقت من الاشتغالات
زهقت من الميكروباصات
زهقت من شكل الزبالة
زهقت من شكل البشر
خايف آه خايف
خايف أعدي الشارع
خايف ابني يتخطف
خايف ابني يتقتل في خناقة في الشارع
خايف ابني يدوسه ترماي
ولا عيل غبي يزقه يرميه من بابه اللي مفتوح
خايف من عيل أهبل رايح المدرسة بمطوة ولا بكتر يغز واحد من عيالي
خايف
خايف يحصلي حاجة مايلاقوش دم ينقلوهولي
خايف لو لقوه يكون فيه فيروس سي
خايف اروح لدكتور سنان ينقلي فيروس
كعب رجلي بيوجعني من سنتين
ودايس عليه ولا أسلمها لدكتور

في إيه يامرسي
بلاش مرسي
في إيه يابشر ، بتاكلوا في بعض ليه ، والله آخركم حفرة وقطنة ، في إيه كل واحد ماشي كأنه رئيس الجمهورية ، أهو إسألوه محتاس حوسة سودة ، طب رئيس الوزرا مش قادر حتى ينفذ جدول أعماله اليومي ، إسأل أي وزير لو رجعت الايام تقبلها ، لو قال آه يبقى حمار البعيد مابيفهمش
الحمار اللي طلع بعمارة سبعتاشر دور .. طب ماشي معندوش ضمير وفهمنا ، وكحول عايز ياكل عيش ، وسلمنا بكده ، طب الحمار اللي اشترى منه الدور السبعتاشر وهو شايف العمارة مايلة كنت شارب ايه
طيب بما إني درست شوية إقتصاد كده على ماقسم ، حد يفهمني .. شارع مصطفى كامل كان واقف فيه بقر وغنم ييجي بخمسين مليون في العيد ، يعن اسكندرية دي دبحت دبايح بحوالي مليار جنيه لوحديها ، يعني بنتكلم على شعب دبح في تلات ايام دبايح مش أقل من خمسة وعشرين مليار جنيه .
قولوا لي بالله عليكم دي بلد فيها أزمة اقتصادية منين ، وفيها رئيس وزرا يقولك أزمة سيولة ، وخبير اقتصادي يقول التضخم ، حد يقول لي نقول لهم ايه بالعقل كده
معقول ياربي البلد دي مافيش فيها راجل يلمها ، معقول يعني البلد دي ماينفعهاش غير واحد حرامي ،
طبعا في واحد عبقري هيقول ، انت جبت إيه جديد ، طيب عايز أسألك انت … انت عملت إيه جديد .. أنا نزلني أشتغل وأنا أجيب لك الجديد … نفس العبقري هيقول لك كلهم بيقولوا كده ، وأول مايستلموا الشغل مابيعملوش حاجة .. طيب لما هو الحال كده … باصص لي في الكلمة ليه … باصص لي في شغلي ليه .. يعني لما كله بيعمل كده وبتسيبه قاعد على راسك تلاتين سنة ويسرقك ، ويبيعك أرضك بفلوس مزورة … طيب أنا مش عايز أقعد على راسك ، يا أخي أنا عايز أقف جنبك ، انت مابتعملش حاجة ، وأنا برضه مش هاعمل حاجة ، عادي حقي زي ماهو حقك .. ومش عاجبك إقفل وغور في داهية ، ماجاتش عليك ، بقالي كام سنة باكتب ومحدش بيقرا ، جي تقرا وأنا قرفان وطهآن منك ومن شكلك

ياناس ماترحموش بعض .. ده حلم بعيد .. بس اتعلموا تسيبوا غيركم في حاله ..
اتعلم تسيب اللي انت مش عايزه
اتعلم ماترميش زبالتك من شباك العربية
اتعلم لما تركب جنبك واحدة في المواصلة ماتستغلش الزحمة وتلزق فيها
وانتي ماتستغليش الزحمة وتقربي منه
اتعلم تقول للناس سلام عليكم
قول لهم صباح الخير
اتعلم تقول لو سمحت
من فضلك
اتعلمي ماتطلعيش أسرار بيتك
وانت مش كل واحدة تقابلها تقول لها مراتي مابتلبسش ومابتعملش
كلهم بينعموا صوتهم ويدلعوا برة البيت ، وجوة البيت عادي صاحبك .. باقي شوية وتسبلك ميت ملة
يا ناس يابشر الشعب ده عايز له شعب تاني يفهمه الناس بتعيش ازاي
والله والله
الخير كتير
وعندنا أرض تكفي أفريقيا كلها تعيش معانا وتاكل من أرضنا
عندنا أرض تكفي أوروبا كلها تيجي تقضي الشتا عندنا
عندنا مية تشرب أفريقيا كلها
عندنا كهربا تنور العالم كله
عندنا أكل يكفينا ليوم الدين
عندنا فلوس تهد بلاد وتبنيها من تاني ويفضل فلوس

عندنا كل حاجة … كل حاجة … بس ماعندناش عقل … مافيش مخ … العقل الفردي أناني … والعقل الجمعي رايح في داهية

هي دي مصر اللي بتحكمها يامرسي .. لو متخيل إنك هتحكمها زي ما أي رئيس بيحكم بلد تانية يبقى اسمح لي … خدعوك
وانت خدعت نفسك لما وافقت
يبقى عليه العوض فينا
وعلينا العوض فيك
وعليهم العوض في البلد الاربع سنين الجاية
ليه … ليه البلد مصممة تمشيني منها .. اتغربت أكتر من تلاتين سنة
راجع إيد ورا وايد قدام
وكله مازال متخيل إني مخبي الملايين وباضحك عليهم
قلت أعيش عيشة أهلي .. بس حتى عيشة أهلي مش عارف أعيشها
الخوف ماليني .. صبح وليل ..
ومع ذلك والله باحب البلد دي ..
غصب عني .. ماعنديش بديل
ولأني والله عارف إن فيها الخير .. وفيها أكثر من اللي أهلها محتاجينه
بس تعمل إيه في البشر

حسبي الله ونعم الوكيل فيكم

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s