الزند .. فضحتنا قدام اللبنانيين

طبعاً كلنا حضرنا الفيلم الهندي بطولة أحمد الزند لما طلع من المستشفى بكامل أناقته المعهودة ، ومغطي الخربوش اللي في وشه وقال لنا محاولة اغتيال ، وياسلام فيها واحد فلسطيني “متوحش” ، وطبعا قبله الاعتداء على المدعو محمد أبوحامد ، طالع في الصورة بكرشه الرياضي ، وبرضه متخربش في وشه ، قبله كان الاعتداء الوحيد اللي وصل للعناية المركزة ، الاعتداء على صبحي صالح ، وتم حرق سيارته ، أما الاعتداء على الفخراني وابو العز الحريري وابو حامد والزند تلاقي ياعيني المتوحشين خربشوهم في وشهم ، طبعا الزند عشان هيبة القضاء ما قطعوش هدومه .

أنا مصدق إن “المتوحشين” بتوع الإخوان ، ومعاهم المتوحشين بتوع حماس هما اللي ورا الاعتداءات دي ، بس حرصا على سلامة المصابيين جايبين بلطجية من مدرسة غزة الإعدادية للبنات !!! يالهوتشي يا أوختشي ..

طبعا الفضيحة اللي مضطر إني إعتذر عنها لأصدقائي وصديقاتي اللبنانيين ، لما بيحصل خلاف سياسي في لبنان ، ويحبوا يخلصوا من خصم ، بيجيبوا متفجرات بجد ، مش شماريخ بتاعة حزب الوفد ، يعني الله يرحمه رفيق الحريري لما حبوا يخلصوا منه ، عملوا مجزرة شالوا فيها نص بيروت ، وتسببوا في شلل تام للبنان استمرت آثاره لسنوات ، ولما يحبوا يقتلوا صحفي ولا ضابط ولا سياسي تلاقي قتل بجد ، يعني مجزرة .

طبعا أنا مش عايز نوصل لهذا المستوى ، لأن إحنا المصريين لما بنشغل الفهلوة أكيد هنعملها بوحشية أكثر من لبنان وسوريا والعراق مع بعض ، ربنا يسترها ، لكن بلاش خيابة ، عيب عيب .

عيب لما حازمون حبوا يحرقوا حزب الوفد جابوا شوية شماريخ بمية جنيه ، وطبعا لا يخفى عليكم إن “الإخوان” اللي اتحرقت مقراتهم قاعدين بيخزنوا أسلحة من اللي بيهربوها من “ليبيا” من ساعة ما قامت الثورة عندهم ، خلونا نقتنع إن ليبيا هي المصدر الرئيسي للمخدرات والسلاح ، مع إن المخدرات بتتزرع وتتصنع في مصر ، والسلاح بيتصنع في مصر في كل محافظة ومدينة ، والداخلية عارفة أماكن صناعة السلاح في مصر .. مش فرد روسي ولا مسدس بلدي ، لا إحنا بنتكلم عن آلي و ذخيرة .

عندي طلب للي “بيلعبوا” سياسة في مصر .. الله يستركم يا تلعبوها بوساختها صح ، يا إما الله يستركم بلاش صياعة الخرابيش ، لأن أي “عركة” بتحصل على قهوة في محرم بك ولا كرموز أو بحري ولا باكوس بيبقى فيها إصابات تشرح القلب العليل ، يعني لما “مرة” بتحب تعلم على واحد بياخدله تمنتاشر غرزة في وشه ، أو بترسم له قلب على دراعه يفضل معلم طول عمره ..

 

عيب يابو العز فضحت كرموز ومحرم بك اللي انت عايش فيهم طول عمرك ، لما تحب تنضرب جيب عيلين من على أي قهوة في محطة مصر يفتحوا لك كرشك من غير مايحصلك حاجة ، العيال دي بتعرف تعور نفسها كويس وتخض الناس وهم عارفين إن طالب امتياز في الميري حيلم الليلة ، ويطلع في الآخر بطل .

أصدقائي اللبنانيين ، وأصدقائي الغزاوية إقبلوا إعتذاري نيابة عن الشعب المصري الفاهم صح ، إحنا عندنا عيال مخربشة ، بس للأسف السياسيين اللي عندنا مابيجيبوش غير بنات إعدادي يخربشوهم .. طبعا واضح إن الفلسطيني اللي اتمسك ده من الشباب اللي اتربوا هنا في مصر ، وتلاقيه مدارس أجنبية ، يعني ماشافش انتفاضة ، لأنه لوشافها ، كان عرف يجيب الحجر في عين الزند مباشرة ، ولو إني متأكد إنه مش هو ، ولا الزند “اتخربش” حتى من قطة سيامي …

جتكوا خيبة .. فضحتونا !!!!

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s