ربنا مايوقعكوا في واحد “بيصيع” على كبر .. وإيه مكمل علامه

dr_morsyمرسي لعبها “خرسه” ، ولبس كله في أوسخ سور حديقة مصدي ، وضحك على كل المعلمين اللي حبوا يصيعوا عليه . وبصراحة أنا متكيف لأقصى درجة ، إفتحوا التلفزيون وشوفوا اليتامى بتوع مدينة الإنتاج الإعلامي ، مش لاقيين حاجة يعملوها ، يارب يارب يلموا مليون بطانية ، بس هناك قاعدة ثابتة “إن الله لايصلح عمل المفسدين” .
طبعاً بما إني أعتقد إني مش منافق ، واللي على قلبي غالباً على لساني ، أنا من الأول قلت لا مرسي ، ولا خمسين واحد بقدراته ، ولا حتى محمد علي باشا شخصياً يقدر يحكم البلد دي في الظروف المهببة إللي هي فيها .
بس أنا من أول ما مرسي طلع الإعلان الدستوري وهو مخيش في نفوخي .. ليه .. عارفين لما واحد ابن ناس من العيال اللي بتذاكر كتير وأبوه مانعه يلعب كورة في الشارع ، وفي الآخر يدخلوا طب وهندسة ، مالهمش في الصياعة ، يعني مايعرفش أصلا قرن الغزال دي راجل ولا ست ، وآخره “ياوحش عيب” ، فجأة ابن الناس ده نزل الشارع حافي ، وبالفنلة الحمالات ، ومسك كزلك .. و ساطور من عند الجزار اللي جنبهم ، وطاح يابا في الشارع ، وبعدها طلع ينام عشان عنده امتحان تاني يوم.
هو ده اللي عمله مرسي .. ما نفعش مع أم الشعب ده إلا الغشومية ..
إفتح التلفزيون شوف الإعلاميين ، ياعيني مش لاقيين حد يجيبوه ، مقضينها حكاوي مع ناس أول مرة نشوفها ولا نسمعها ، وكلام من عينة إيه رأيك في الخطاب ، طب قصده إيه ، واللي بيتكلم عن هشام قنديل ، وتحت كل شوية يجيبلك الزند راح للنائب العام ، ويناشد وكلاء النيابة بالعودة لأعمالهم ، ومجلس القضاء الأعلى هيبوس إيد الراجل عشان يهدوا الجو ..
أنا ماشفتش الخطاب ، بس متأكد إنه أكيد مافيهوش حاجة مفيدة ، لأن المفيد إن الراجل ده كان يطلع معلق الكزالك ، وراشق المطوة قدامه ، ويسب للبرادعي وحمدين تلاتين ميتين اللي جابوا شبههم .
لقد عاد مرسي إلى قواعده سالماً ، بس المهم لاتأمنوا “صياعته” لأنه عرف السكة ، واللي زيه لما يعرف السكة مالوش حل ، ده متعلم وبتاع مدارس ، ومش واخدها بخمسين في المية ، وربنا مايوقعك في صايع على كبر ، وإيه .. ومكمل علامه.
طبعاً الفترة اللي فاتت الناس كانت مستغربة أنا إزاي أؤيد هذا الدستور ، أرجع وأقولها تاني .. إنفض السامر .. واتكلم في خلو بلادي .. والله لو عقد بيع زريبة كان اتكتب أحسن من كده ، لكن ، ولا عربجي من اللي بيرقصوا على كل حبل كان هيكتب أحسن منه ، والدليل ، قالوا له .. الدليل .. إن ولا قرد طلع قال المادة دي غلط ، وكان لازم تبقى كذا أو يعدل .. كل واحد وقف يقول .. الدستور الإخواني ، وأخونة الدستور ، وأخونة الدولة والمسيحين ، والبهائيين ، والبوذيين ، وطبعا نسيوا في غمرة هبلهم ، أن الشعب مهما كره الإخوان ، فإنه في النهاية يحب الحاكم القوي “شعب صايع وفاهم” .
هؤلاء الأغبياء برعونتهم ، وعدم صدق قضيتهم أوهموا الشعب بأن الإخوان لديهم إمكانيات أكبر بكثير مما لديهم في الحقيقة ، وهذا مايريده الشعب البسيط ، وإن لم يصرح به ، قالوا لهم بمباركة أمريكا ، فالشعب يقول وانتوا كنتوا هتيجوا بمباركة السنغال مثلا ، قال لك ميليشيات ، قالوا طب ماشي حلوا عالأقل يقفوا قدام البلطجية بتوع نخنوخ ، وطبعاً لما اتحرقت المقرات قالوا لهم الله .. فين ياعم الميليشيات ، طلع اللي قال لك هولوكوست .. الشعب الغلبان مالوش في اللوع بتاع الأكلات الغريبة دي ، طبعاً وتلاقي إبراهيم عيسى طالع بصاجات .. يعني مش كفاية حمالاته ..
ماننساش في غمرة ذلك عين خمسة كانوا في الحزب الوطني في الشورى ، وجاب معاهم مؤمن بتاع السندويتشات ، طب بذمتكم في كده .. ريس معيشكم في كوميديا ، وخلى كبرات البلد ماعادش في راسهم شعر يشدوه ، وملاحظين حضراتكم إن أحمد شفيق لاحس ولا خبر تقريبا والله أعلم يمكن إدوا له حقنة في الغدة النشوية .. الله أعلم ..
طب عايزين الشعب يصدق مين ..
بصوا بقى من الآخر أنا ماكانش بينزل لي من زور أحمد أبو بركة ، بس بصراحة العالم دي مش هينفع معاها غير صبحي صالح وأحمد أبو بركة والبلتاجي ، ولما يحبوا يهدوا شوية ويجيبوا حد بيمثل دور العقل يجيبوا عصام العريان.
إنتوا شعب ده آخركم

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s