كتيب تعليمات استخدام وسائل التواصل الاجتماعي – فيس بوك وتويتر

لما تدخل فيس بوك وتويتر افترض إنك داخل مقهى أو كافيه مش رايح تزور أهل خطيبتك في شم النسيم

بمعنى

– إختار المقهى اللي يناسبك انت وصحابك مش شرط المقاهي الغالية

– لما تقعد خليك في حالك و لما حد يتكلم ماتاخدش المواضيع على (سدرك) أوي

– لما تتأخر الكومنتس واللايكس ماتقومش تضرب القهوجي عشان ده غلبان

– ماتنفخش دخانك في وش حد بس ماينفعش تدخل قهوة بلدي وتقول طفو سجاير وشيش عشان أنت ما بتدخنش

– مش كل واحد بيكلم خطيبتك على فيس بوك يبقى كان بيحبها زمان ولا هي بتخونك ، لأن في الكافيه اللي انت متخيل إنه بيبصلها ممكن يكون شخص أحول مثلا أو تكون سعادتك من كثر سرحانك في الحب مش واخد بالك إنك قاعد تحت التليفزيون ومفكر الناس بتعاكسها

– الحاج مارك ورجالته الله يعمر بيتهم عاملين “أوبشنز” عجيبة منها على سبيل المثال لا الحصر “أن فريند” “بلوك” وحاجات تانية كثير ممكن تستخدمها عادي ، بس مش معنى إن صاحبك عملها إنه كان متجوز الست والدتك وقرر يطلقها ، ولا إنه قرر يهد العمارة اللي بنيتوها سوا

– بعدين خليك “نور” بكسر النون وفتح البون 🙂 يعني مش كل حاجة صاحبتك الافتراضية عاملاها تعمل عليها لايك ، وتقعد تعصر في قاع الجمجمة عشان تجيب كومنت “يجيبها الأرض” واذا ماجابهاش هي يبقى “يجيب صاحبتها” لأن لاهي شايفاك ولا صاحبتها عارفاك

– بعدين “ياأختشي” انتي ياللي فشتك عايمة لما تدخلي على بروفايل واحد “وليكي شوق” لحاجة حلوة “مش وحشة ” لاسمح الله ، في إختراع إسمه “ماسج” ابعتي له وقولي له ممكن أعمل لك “آد” مش شرط تقعدي تتنطي وتضحكي حوالين الترابيزة اللي قاعد عليها الولة ، ولما يبص لك تقومي تقلعي اللي في رجلك وتفضحيه … ويبقى “عيني فيه وبقول إخخخيه”

– وبعدين لما تيجي رايحة الحمام مش لازم أمة لا إله إلا الله تعرف انك رايحة ، يعني مش لازم “ياجماعة أنا قايمة أنام” …… ولا ….. “مين صاحي يابشر عشان أنا مطبقة من امبارح وداخلة آخد شاور وأنام “.

– وبعدين بطلي نفسنة مش عشان صاحبتك طالعة في الصورة أحلى منك تقومي تشيلي البنية من الصورة

– ولما حد تفاجئي إنه بيكلمك على حاجة انت كتبتيها ما تفترضيش إنه عرف سر خطير لأن فيس بوك ده مش صاحبتك الأنتيم

عارف إني هاتضرب بمية “بلغة” بس ولا بيهمني … المهم ماتدعوش علي … أنا بحبكم كللللللللكم بس مش ها تجوز ولا واحدة ….. لأني بصراحة مش فاضي

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s