ألا سؤال … يعني إيه إستحقاق

وبما أننا على أبواب الاستحقاق الثالث وهو الاتنخابات البرلمانية ، فنحن أمام فصل من فصول الكوميديا السوداء ، سنلتقي بأشكال ضالة تفوق في ضلالها الأشكال التي ألفناها في مجالس فترة حكم مبارك ، والأشكال السخيفة التي كانت موجودة في مجلس الكتاتني.
من مشاهداتي خلال الفترة الماضية أتوقع أننا أمام أعضاء مجلس نيابي أغلبهم من الفنانين ، والإعلامين ، والقضاه والضباط والدبلوماسيين والوزراء السابقين فهؤلاء كانوا هم الظهير الصحراوي لحملة تصعيد الرئيس السيسي .
شبه متأكد من أن عمرو موسى سيكون رئيس المجلس القادم .
سيتم الدفع بخالد يوسف وطائفة من الفنانين والمطربين والمنتجين
أتوقع وجود إعلاميين من أمثال عماد أديب ، مجدي الجلاد ، وأحمد موسى ، ومحمد الغيطي ، وربما محمود سعد وتوفيق عكاشة وغيرهم خصوصاً إعلاميي القنوات التي ستختفي من الوجود بطبيعة الحال لانتهاء جدواها إقتصادياً وجماهيرياً -علماً بأن اختفاءها سيكون على شكل إندماجات أو استحواذات ، أو تغيير أسماء وملاك ، خصوصاً القنوات المملوكة لرجال إعمال غير إعلاميين ، نظراً لانتهاء حاجتهم لها وحاجتها لهم .
طيب إنت يا صاوي عايز إيه من الشعب
ولا حاجة … إتفرجوا زي مابتعملوا دايماً ، وطبلوا وارقصوا عالربع نقل ، وبعدين امسكوا العيال اللي بتتحرش ، وصوروا الضحية عريانة ، عادي مهي هتطلع عمرة هي وامها وبنتها ، بس الله يخليكم بلاش تتحرشوا بمسيحين عشان كده تبفى حوسة الراجل يوديهم فين ، السعودية وفي إيدينا ، وربنا يخلي لنا خادم الحرمين فتح باب الصدقات لمصر .. آسف المنح … بس يافرحة ما تمت … خدها داعش وطار … شرد الموصل وتكريت ، وطبعاً الناس دي أولى بالدول المانحة ، خصوصاً إن حسابهم لسة مفتوح من أيام ما وقع صدام …
تصدقوا داعش دي مفيش عندها دم ، يعني … مش قادرة تستنى لغاية ما الشقيقة الكبرى مصر تعود ” لمركزها الريادي ” في “حظيرة ” القومية العربية … دا الراجل لسة حالف اليمين من تلات ايام ، مش قادرين تستنوا عليه شوية .. ويقول لك أرفض أن أكون أسير نظرية المؤامرة .
يلا روحوا ياكش تولعوا بجاز … انتوا اللي جبتوه لنفسكم . إلبسوا مع إيران وورني أبو راجل مين يطلعكم منها .. هو الراجل يلاحقها منين ولا منين.
إرهاب ، وإخوان ، وتحرش ، وكله فاتح بقه عايز حقه من وقفته معاه السنة اللي فاتت ، وحفطر ، وحتعشى ، وسد النهضة وقطر وحماس وأبو عباس وأوباما وبوتين وليبيا والسودان شمال وجنوب وغرب واتحاد أفريقي مستني الشقيقة الكبرى برضه .
كل ده غير إنه يفهم نص الشعب إنها ثورة مش انقلاب ، والعيال بتوع تمرد اللي فاتحة بقها وهتبدأ تعمل ثوريين ، ولازم يتلبوا عشان يفهموا حجمهم ، وحزب النور اللي لازم يتشكم ألا يصدق نفسه ، ومعارضة الخارج اللي عاملين سبع رجالة في بعض وفيسبوك وتويتر ، ورجال الأعمال اللي صرفوا يفط ومقرات وتليفونات وفطار وغدا وعشا .
ده كله غير الدول اللي ساعدته ، ياكش تكون مصدق يا مؤمن إن في حاجة ببلاش ، ده أهو من قبل ماييجي الراجل وقاعدين بيضربوا له العملة عشان لو اضطروا يدفعوا ، الدولار مايعورش ، والشعب فرحان إن الدولار سعره بيزيد ، أول مرة أشوف شعب فيه ناس مش فاهمة يعني إيه عملته سعرها بينزل كل يوم قرش وقرشين … وفي ناس فرحانة بجد ، وعلى فكرة مش عملا ولا خونة ، هو عنده شوية دولارات ودهب ، فأكيد بيفرح إنهم بيجيبوا جنيهات أكثر … صدقني مش عميل و لا خاين ، دا البعيد حمار مخه جابه كده ، بس هو حمار ومعذور ، الدور والباقي على اللي فاهم وعارف وبيشرح للناس وبينظر لهم ، وبرضه بيعمل زي الحمار اللي مش فاهم .
أنا من موقعي هذا أقول ده مش كان المفروض يفضوا رابعة والنهضة والحرس الجمهوري – على ما قالت بعض الآراء- أيوه يابا أنا عايز آكل عيش إشمعنا جت عليا يعني ، ويحكموا “عالنوشتاء” ، ده المفروض كانوا يفضوا الشعب المصري كله ، ولو في جاز يكفي كانوا ولعوا فينا أبركلهم.
ياراجل ده إحنا شعب لعين ، ماحكمنا ريس إلا احتاس بينا وشحت علينا ، ولا بيطمر فينا ، وفي الآخر معندناش ضمير مش نشكر النعمة ، لأ … إلا بنهج ونسيبهم محتاسين بيها وببقيتنا اللي مش قادر يلجأ للدول الشقيقة والصديقة ..
مبارك عليكم ولا بلاش … مبروك عليكم الاستحقاق الثاني ، وأهلاً بكم في الاستحقاق الثالث وكل استحقاق وانتوا طيبين ….

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s