كلام واحد غرقان في مرقه من امبارح

مش عارف ليه حاسس إن في حد حيطلع بكرة يقول إن أمريكا مركبة قمر صناعي متسلط على مصر تحديدا ، وهذا القمر يبث إشعاعات نووية تؤثر على عقل المصريين.
بحيث إنه يجعل جميع الناس مرهقين طوال الوقت ، لا عقلانيين على الدوام ، كوميديين لحد السفاهة ، مكتئبين لحد العبط.
يخربوا بلدهم بإيدهم ويلعنوا كل اللي يشوفوه ، ويتهموه بالتخريب.
بيناقضوا أنفسهم طول الوقت ، وكلمة توديهم وكلمة تجيبهم .
صحيح كل اللي كانوا إرهابيين في الثمانينات أصبحوا منظرين للإصلاح في مصر إزاي.
الإخوان اللي خربوا البلد … ماشي بيصادروا أموالهم ، كلها مدارس ومحلات ومزارع ومصانع ، مالقيناش خمارة ، ملقيناش مصنع سلاح .

أنا معاك انهم ضيعونا “بغباوتهم” السنة اللي حكموا فيها ، لكن وأنت العاقل ، تصدق إزاي مذيع ولا مذيعة مستضيف واحد قعد في السجن سنين لأنه كان متهم في إرهاب وقتل ، وسايبه ينظر ويخطط للبلد.
إزاي عايزني أصدق إن في “مرة” عاقلة في بلد عاقلة مستضيفة واحد عاقل يقول الفتوى اللي قلتها بتاعة تبص على خطيبتك وهي بتستحمى دي قلتها في زمن كنت أؤمن فيه بفكر خاطيء ، هو انت بروح أهلك صدقت إنك ممكن تبقى زي الشافعي يغير مذهبه من بغداد لمصر … طيب الراجل شرح السبب وأن حال أهل الكوفة غير حال أهل مصر وظل المذهب فيه المدرستين معتبرتين في الفقه.
إنما انت إيه … واش عرفني إن أم المذهب اللي انت عليه دلوقتي مش فاسد وتيجي بعد عشرين سنة ترجع عنه وتبقى خربت حياتي وحياة عيالي…
مش عارف واحد زي ابراهيم حجازي اللي قاعد يتفتف عالكاميرا يقدم تقرير عن جمعية إسمها ولادي ، وهو قاعد يقول بلادي . … بلادي بلادي ياخويا …
مش فاهم … معقول يا اخوانا … انا عشت برة البلد دي تلاتين سنة .. وفي لحظة عته رجعتلها ، والله والله ما عارف آخد قرار اني حتى أنزل أمشي رجلي شوية … مش عارف أفكر حتى بعد تلات دقايق حعمل إيه … كنت أستطيع أن اقنع اشخاص باستثمارات أو الرجوع عنها بدون هذا الكم من العته…. دلوقتي مش عارف أقنع نفسي أكلم واحد في التليفون ….
سيبكم مني أنا عارف اني حمار يوم مارجعت بلدكم آه بلدكم … مش ممكن تكون دي بلد بني آدمين عاديين …
البني آدم العادي بيحاول الحاجة مرة لقاها سد يغير طريقه لغاية ميلاقي سكة … انتم شعب بتقنعوا نفسكم إن في واحد ابن كلب في مكان ما من الكون حييجي ويشيل الحيطة وانتم أصلا مش عارفين وراها كام حيطة ولا حفرة ولا جبل ولا سلك كهربا ولا الحيطة دي سانده أيه ولا ساترة إيه.
كل واحد تقابله يقول لك نفس الاسطوانة
شعب زبالة
الإخوان ولاد كلب
مرسي حمار
السيسي بطل
الحكومة بنت كلب
محلب تاعب نفسه
الكهربا
الزبالة
عمر ما في حد عمل حاجة يقدر يقول والله عملت ، الجهاز الوحيد اللي ناجح في البلد دي ترماي اسكندرية …
شغال بعربيات من السبعينات ولسة بيجبسوها ويمحروها وعمرك يا مؤمن ماجه عليك يوم مالقيتوش …
غير كده والله مافي حاجة ماشية خطوتين على بعض.

معقول ..
معقول نعمل “ثورتين” … “آل إيه” عالظلم والفساد ، ويطلع واحد بقى له سنة طايح في مخاليق ربنا جايب تسجيلات … لو مسجلة بأمر قضائي لا تستخدم إلا في المحاكم ، والناس تسقف وتطبل ، ولما خلصت حاجتي ، رموه رمية الكلاب ، والناس برضه بتسقف وتطبل ، ولو رجع بكرة برضه حتعمل نفس الحاجة …. ياراجل ده المولد مبيعملوش كده … المجانين مبيعملوش كده…
معقول واحد بيطلع في الاعلام وفيسبوك وتويتر اكثر من رئيس جمهوريته … يسب ويلعن ، وطايح في البشر وسيديهات ومكالمات مسجلة على كل الناس ، وإيه رئيس نادي ، يا أخي عيال زايد الله يرحمه كل واحد فيهم عنده بدل النادي اثنين ، وبنك ولا اثنين ، ده غير وظائفهم الرسمية … رجال دولة بجد …. لما واحد فيهم بيطلع في التلفزيون بيبقى عيد ، تحس بنور طالع…
يا ناس …. غير طبيعي بالمرة المزبلة اللي احنا عايشين فيها دي …. حرام عليكم … والله حرام … مش عايزينها … سيبوها وغوروا …. مش عايزينا شوفوا لنا بلد تاخدنا ، ولا سمونا واخلصوا منا …
لكن ليه ، انتم نور عنينا ، ومن تحت ضرسه يلعن أبوكم جايبين لي الكافية ، مهو إحنا كلنا إخوان ولاد كلب إلى أن يثبت العكس، والعكس ايه ، ان عندك حد معاه كرنيه وطبنجة يلحقك…
يا راجل ده الست بتقول لجوزها والله أنزل ابلغ عنك إنك إخوان … شفتوا سفالة كده…
إحنا مش طبيعيين …. وإوعى تقولي مؤامرات … اديك باللي في رجلي…
إحنا أكيد أمريكا باعتالنا قمر صناعي ضاربنا بإشعاع ، لايموتنا ولا يسيبنا في حالنا ….

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s