#الحياة_لمحمد_سلطان

PicsArt_1410837718982#الحياة_لمحمد_سلطان

دي رسالة لبعض «الإخوان» اللي حافظين مش فاهمين

التويتة اللي تحت بتتكلم عن واحد إسمه #محمد_سلطان ، مضرب عن الطعام في السجن من أكثر من ٢٠٠ يوم وتم نقله للعناية أكثر من مرة ، وذهب للمحكمة على نقالة وكلم القاضي وهو ممدد قدامه خارج القفص

مين اللي كاتبة التويتة دي وبوست زيها على فيسبوك .. منى سيف ، أخت علاء عبدالفتاح -معلش- أصل أبوهم الله يرحمه أحمد سيف الإسلام عبدالفتاح حمد ، كان ديمقراطي خلى كل واحد ينقي الإسم على مزاجه ، وعلاء عامل ريتويت في أوائل مشاركاته بعد ما خرج ، أمهم الست الجامعية اللي خرجت أجيال بدأت هي وصاحبتها عايدة سيف الدولة إضراب في مايو تضامنا مع عبدالله الشامي ومحمد سلطان .

جميل .. تعرف يا مؤمن مين محمد سلطان مواطن مصري أمريكي عايز تعرف إيه تاني ، آه … يمكن تفيدك أبوه الدكتور صلاح سلطان ، بالمناسبة أبوه أنا اللي أقول لك عنه أحد أنظف وأطهر وأعلم القيادات الإخوانية …

ليه بقول لسعادتك الكلام ده ، لأنك لما طلع علاء ، قمت تهرتل وتغني على نغمات نشاز لا إنت فاهمها ولا عارف تبع إيه ، وأقطع دراعي ان كنت عارف اليسار ده دكر ولا نتاية على رأي عمك أنور السادات  ، وكل ما تلاقي حاجة تذم في الناس دي على طول تسوق فيها …

إيه اللي يخلي أستاذة جامعية تضرب عشان واحد متعرفوش وتقعد عالأرض ، إيه اللي جابرها على كده .

إيه اللي يخلي منى وهي أبوها لسة متوفي ، واخواتها الاثنين في السجن ، تهتم بابن الإخواني بتاعك – لأن انت مش مهتم باليساري بتاعهم – عارف إيه … المبدأ .

المبدأ ده – الله يعزك- حاجة زي قوانين الرياضة البحتة ، تيجي سعادتك وانت في تالتة إعدادي مش فاهمها ، فتقعد تهرتل في إيه فايدتها وإيه لازمتها ، لغاية ما بالعافية تنجح فيها وترميها ورا ضهرك ، وتلاقي بعد كده الرياضة لابسة في كووووووووول حاجة بعد كدة ، فتفضل تنجح في كل حاجة عالحركرك .

لا أنت مؤمن كامل الإيمان ، ولا ناشط بنسبة سبعين في المية ، وسياسي قرطاس ، وإعلامي ضعيف ، وحتى لجنجي خيبان وثائر على ماتفرج وبرلماني نص كم  .

إنما الناس دي درست قواعد اللعبة صح ، فهموها ، طبقوها – حياتهم الخاصة – مش بتاعتك ، وخليك ذكي ، دبلوماسي إلعب مع كله وفيد واستفيد .

فاكر لما قلت لك زمان عيب لما تقول موتوا بغيظكم ، انت لسة ورقك ما اتقبلش في كي جي وان ، فاكر لما قلت لك فلان وفلان محسوبين عليكم ، وجعجعتهم حتوديك في داهية ، فاكر لما قلت لك فلان وفلان دول أول ناس حيبيعوا أهلك قبل القمة الجاية …

مصدقتش … تصدق أنا بشوف علاء على تويتر من سنين في حاجات عادي ما بتعجبنيش فيه ، أتحاشى أدخل معاه في جملة مفيدة لا هو ولا وائل عباس ولا دومة ، لأن بخاف يتعمل معاي السليمة زي واحد صاحبهم وبقى صاحبكم امبارح ، وائل عنده تقريبا لسان تاني لابسه في رجليه وعلى حسب الوضع بيغير مكانه .

لكن ماينفعش أحكم عليه من مواقف سلبية  وأسيب الإيجابيات بتاعته ..

على فكرة انت لو مكنتش فشلت في «البحتة» كان المفروض تستعمل أدوات الدعوة واحدة واحدة ، مش عشان يبقى زيك.. بس على الأقل تقلل حدة ماتراه أنت بحصافتك خطأ.

يابني .. نحن في وطن ، لو كلنا فضلنا زي بعض الأشكال الضالة اللي بتشوفها عالتلفزيون بالليل ، طالعة تتفتف على خلق ربنا عمرنا ما حنكون حتى عزبة ..  حنفضل في نفس الزريبة ، والكلاف بيرمي لنا أوسخ حاجة ، ومش هاين عليه ينضف تحتينا …

على فكرة مامة علاء ومنى إسمها الدكتورة ليلي سويف أستاذ رياضيات في جامعة القاهرة ، وعلى فكرة عندها كمان بنت اسمها سناء ، قد ركبتك ، امتحنت في الحجز من كام يوم وجابت امتياز  ، إدعي لها ربنا يرجعها لمامتها واخواتها وانت بتقول #الحرية_لمحمد_سلطان

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s